Soluzzjonijiet
Il-klima u l-enerġija
Hemm ħafna x’nistgħu – u li jeħtieġ li – nagħmlu biex id-dinja tagħna nagħmluha waħda li tikkonsma inqas enerġija u li tiffavorixxi l-klima.
Affarijiet li jeħtieġ li naqtgħu!
Jeħtieġ li nsibu soluzzjonijiet li jgħinuna nnaqqsu l-emissjonijiet tal-gassijiet serra. Minbarra li hu tajjeb ukoll għall-pjaneta, hu tajjeb ukoll għal saħħitna (inqas tniġġis), għas-sigurtà tal-provvisti tal-enerġija tagħna u għall-ekonomija, għaliex joħloq impjiegi ġodda.
Enerġija rinnovabbli
Mod ta’ kif innaqqsu l-emissjonijiet ta’ gassijiet serra huwa billi nużaw enerġija aktar rinnovabbli, bħall-enerġija mir-riħ u mix-xemx. Dawn jipprovdu provvisti bla tmiem ta’ enerġija, għall-kuntrarju tal-fjuwils fossili, li xi darba se jispiċċaw. U għall-kuntrarju tal-ħruq tal-fjuwils fossili fl-impjanti tal-enerġija, il-ġenerazzjoni tal-elettriku minn sorsi rinnovabbli tipproduċi ftit jew l-ebda gass serra.
L-UE hija mexxejja dinjija fit-teknoloġiji tal-enerġija rinnovabbli, u bosta pajjiżi tal-UE diġà qegħdin jiġġeneraw ħafna mill-elettriku tagħhom minn sorsi rinnovabbli.
Il-ksib ta’ aktar mill-enerġija tagħna minn sorsi rinnovabbli mhux biss inaqqas l-emissjonijiet iżda jfisser ukoll li jkun hemm inqas infiq fuq l-importazzjonijiet ta’ faħam, żejt u gass minn barra l-UE. Fl-2020, aktar minn 22 % tal-enerġija tal-UE ġiet minn sorsi rinnovabbli.
Skont il-Patt Ekoloġiku Ewropew, il-pjan huwa li din ir-rata tiżdied għal mill-inqas 40 % sal-2030.
Nużaw inqas biex niksbu iktar!
Il-pajjiżi tal-UE qed jaħdmu qatigħ biex inaqqsu l-emissjonijiet ta’ gassijiet serra, biex jgħinu lill-UE tilħaq il-miri globali ta’ tnaqqis tagħha: tnaqqis ta’ 55 % sal-2030 meta mqabbel mal-1990. Sal-2050, l-UE għandha l-għan li ssir newtrali għall-klima, billi tnaqqas l-emissjonijiet u żżid l-assorbiment ta’ gassijiet serra mill-atmosfera biex tilħaq emissjonijiet netti żero.
Post jaħraq
L-enerġija ġeotermali hi biċċa taħraq!
Xi pajjiżi jistgħu jużaw l-enerġija maħżuna taħt wiċċ id-Dinja biex isaħħnu l-pajpijiet li jsaħħnu d-djar u l-ilma, jew biex iħaddmu ġeneratur li jipproduċi l-elettriku.
Ħafna spas fl-Ungerija jużaw l-enerġija ġeotermali biex isaħħnu l-ilma għall-attivitajiet rikreattivi u l-UE qed tappoġġja proġetti innovattivi tal-enerġija ġeotermali hemmhekk ukoll.
Innaqqsu s-sussidji għal fjuwils fossili
Hemm appoġġ finanzjarju pubbliku sostanzjali għall-produzzjoni u l-użu tal-fjuwils fossili, li jirċievu sussidju kważi d-doppju ta' kemm jirċievu sorsi rinnovabbli. L-enerġija rinnovabbli tkun saħansitra aktar kompetittiva jekk il-fjuwils fossili jirċievu inqas appoġġ.
Mogħdija għaċ-ċiklisti li tiġġenera l-enerġija solari
Fl-2014, inbniet mogħdija għaċ-ċiklisti mhux bħal tas-soltu fin-Netherlands: waħda li tiġġenera l-enerġija solari. Il-mogħdija b’tul ta’ 72 metru fi Krommenie, qrib Amsterdam, għandha ċelloli solari installati fiha li jikkonvertu d-dawl tax-xemx f’elettriku.
Fl-ewwel sena, aktar minn 300,000 ċiklista saq fuq din il-mogħdija għaċ-ċiklisti magħmula bħala prova, u b’kollox iġġeneraw biżżejjed elettriku biex jissupplixxi tlett idjar bl-elettriku għal sena!
Ideat ġodda fl-orizzont
Biex jinstabu soluzzjonijiet sostenibbli għall-indirizzar tat-tibdil fil-klima, huma meħtieġa skoperti u riċerki xjentifiċi ġodda.
Orizzont Ewropa, l-akbar programm ta’ riċerka u innovazzjoni tal-UE li qatt kien hawn, għandu EUR 95.5 biljun ta’ finanzjament disponibbli bejn l-2021 u l-2027 biex jgħin lir-riċerkaturi u lill-innovaturi jiżviluppaw ideat li jistgħu jiġu applikati fid-dinja reali.
Ammont kbir mill-fondi (aktar minn 35 %) se jintnefaq fuq proġetti relatati mal-klima.
L-UE qed tappoġġja wkoll l-iżvilupp ta’ impjanti tal-enerġija innovattivi li jagħmlu użu baxx mill-karbonju.
Xiri sostenibbli
Fl-2016, il-belt ta’ Modena fl-Italja ssieħbet ma’ konsulenti tat-teknoloġija ambjentali għar-rinnovazzjoni ta’ supermarket kbir, taħt proġett iffinanzjat mill-UE, sabiex dawk l-inħawi jiġu modernizzati u jsiru aktar ambjentalment sostenibbli.
Bis-saħħa ta’ soluzzjonijiet innovattivi, bħal tubi solari li jgħaddu dawl tax-xemx dirett (mingħajr ħlas) fis-supermarket, il-bini issa juża ħafna inqas enerġija u għandu spejjeż operattivi aktar baxxi.
Enerġija rinnovabbli 100% sal-2030?
Fil-kontea ta’ Kalmar fl-Iżvezja, l-awtoritajiet u l-kumpaniji tal-enerġija lokali qed jaħdmu flimkien biex sal-2030 iż-żona tkun kompletament ħielsa mill-fjuwils fossili.
Jekk dan isir se jiġi żgurat ukoll żvilupp sostenibbli u se jinħolqu l-impjiegi. L-azzjonijiet jinkludu tal-linja li jaħdmu fuq enerġija 100% rinnovabbli, inizjattivi ta’ car-sharing (xi wħud minnhom diġà jużaw karozzi elettriċi), il-produzzjoni ta’ fjuwil mill-iskart tal-ikel u l-kisba tal-enerġija minn parks solari u eoliċi.
